Piemontèis Ancheuj
a l’é na publicassion cudìa dal Centro Don Minzoni – Ca dë Studi
Pinin Pacòt ch’a seurt minca mèis (gavà ’l mèis d’agost quand
ch’a ven abinà al mèis ëd luj) e ch’a l’é scrita dël tut an Piemontèis
e ant j’àutre lenghe dël Piemont. A l’é ’n giornal, o se voroma
blaghé i podoma ciamelo ’dcò arvista, sensa gnun-a tendensa nì polìtica,
nì religiosa ’d qualsëssìa sòrt. Për sòn a veul resté lìber e ’ndipendent
dedicand soa atension mach a tut lòn ch’a peul rësguardé nòstra
coltura an tute soe forme, manifestassion e argoment. Donca a ven-o
tratà la literatura, con poesìa e pròsa, ma sensa dësmentié ’l teatro,
la mùsica, le canson, l’art, la cusin-a, la stòria, le tradission
gënite dla Region, j’aveniment colturaj, ij concors, la botànica,
le curiosità etimològiche, lë blësse naturaj e artìstiche e via
fòrt. L’atension as fërma nen a ’n pùblich ëd grand, ma a l’ha na
fnestra semper duverta sj’atività che a ven-o fàite con ij masnà
e le scòle, an particolar. Coma ùnich suplement a seurt minca ann
l’Armanach dij Brandé, visadì n’antologìa ’d pròse e poesìe sia
dij grand autor dël passà che ’d le vos pì avosà dij nòstri temp.
La forma ’d grafìa ch’a ven dovrà a l’é cola stòrica o dij Brandé
ch’a ten cont dij criteri e dle régole stabilìe ’nt ël 1927 dai
fondator ëd la Companìa dij Brandé. La Redassion a l’é formà da
un grup d’amis con tanta bon-a veuja e ch’as treuvo unì sota ’l
midem drapò dla lenga e dla coltura piemontèise. La publicassion
a seguita sla carzà ch’a l’avìa trassà ’l magìster e Brandé, Milo
Bré, bele se con le evolussion che ij mojen pì modern an buto a
disposission. As pùblico volënté, fasend semper ij cont con jë spassi
a disposission, artìcoj, euvre e contribù ch’a ven-o mandà (a gràtis)
da minca part dël Piemont. Un riguard ëspecial a va a tute le produssion
literarie dël di d’ancheuj ch’an ven-o mandà diretament da j’autor
o ch’a rivo dai vàire concors. Cost a l’é ’n giornal ch’as vend
anans ëd tut për abonament, ma a ven ëdcò furnì a cole edìcole ch’a
na fan arcesta. Na bela partìa ’d còpie a ven mandà, minca mèis,
a scòle e associassion spatarà su tut ël teritòri regional dzorpì
che a dë studios e a d’àutre associassion con le quaj a l’é fasse
na sòrt ëd gemelagi. Con cost sit an sl’aragnà (col ch’e j’àutri
a ciamo ’l WEB) a veul ëslarghé l’orisont ëd coj ch’a peulo lese
costa arvista rivand a toché minca canton dël mond, eufrend a lor
la possibilità ’d conòsse na frisa dla coltura piemontèisa, dzorpì
as dà manera ai tanti piemontèis e dissendent ëd piemontèis, spatarà
’nt ij pais forësté ’d tuti ij continent, ëd manten-e na liura con
la Patria Cita dël Piemont. Dovrand lë strument ëd le «ciaciarade»
(an anglèis BLOG) i speroma ch’a peussa nasse un rapòrt fin-a pì
diret con nojàutri e la manera ’d parlesse, ëd critichesse, dë scambiesse
opinion e consèj e, se pròpi i l’oma quàich mérit, na frisa ’d compliment
për avèj la fòrsa e la cissa ’d tiré anans. |
