DE PROFUNDIS?
 Tant përchè tut ij nòstri letor
e abonà a peusso esse al corent ëd coma ch’a giro le còse i publicoma
costa litra ch’a l’ha mandane la Region Piemont – Assessorà a la
Coltura. A l’é gnente d’àutr che la conferma ’d lòn che già i savìo
da le comunicassion verbaj, ma tutun «carta a canta». Ël piat a
piora, ël botal a l’é veuid, as saro j’uss dòp che le vache a son
scapà e via fòrt. Proverbi o manere ’d dì, la sostansa a cambia
pa. Nòstra fiusa a l’é cola che, se pa d’àutr, vist che ’l finansiament
për ël 2009 a l’é ’dcò scrit sël Boletin Ufissial ëd la Region,
ij dné a saldo a peusso rivé prest. As sà già che costa situassion
a restrà an pé ’dcò për ël 2011 vist che a dovran bin sgairé na
cartonà ’d sòld për festegé l’unità d’Italia, còs ch’a-i na fà se
la coltura piemontèisa a meuir? Meno che gnente, un fastudi ’d meno!
A costa situassion econòmica disastrosa a va a giontesse ’l veuid
legislativ ch’a l’é formasse con la sentensa dla Cort Costitussional
che, l’ann passà, a l’ha bocià la lej regional sla tùa dël Piemontèis.
Ancheuj coma ancheuj i soma ’nt la situassion che nòstra lenga (e
’d conseguensa ’dcò nòstr travaj e angagg) a l’ha nen un pòst nì
ant la legislassion regional nì an cola dlë stat. I soma a la midema
mira dij «brigant», a manca mach pì che an mando ij carabigné, ma
për son a l’é nen ch’a-j manca ’l coragi vist che la Cort Costitussional
a l’ha definì ’l Piemontèis coma na variant ëd l’italian. A-i son
vàire propòste ’d lej fërme an parlament e ch’a dovrìo (se portà
anans con cognission e bon-a veuja daj parlamentar piemontèis) dësbloché
la situassion e a l’é partìe an costi mèis n’archeuita ’d firmé
da presenté a coj monsù ,ch’a stan setà sle poltron-e dë vlu ross
a gieughe con ij sòld ëd tuti, cissandje a desse n’andi. Për cost
but a-i saran ëd banchèt an gir për Turin e ’l Piemont e j’associassion
ch’a aderisso a costa inissiativa as fan càrich ëd porté an gir
ij feuj da firmé. Coma coordinament as fà arferiment a Gioventura
Piemontèisa (contrà San Second n° 7bis-10128 Turin - Tel. e Fax
0117640228 - giovpiem@yahoo.it
e an sl’aragnà www.gioventurapiemonteisa.net).
Chi a l’ha a cheur ël bin e la survivensa ’d soa lenga
e ’d soa coltura ch’a pija ’l coragi a doe man e ch’a vada a firmé,
se a sà nen andoa ’ndé a peul ’dcò scrive a mi p.melampo@gmail.com
o al giornal, bele si ël sit ch’a l’é: piemonteis.ancheuj@virgilio.it
A venta nen lassé perde gnun-a ocasion përchè ij nemis dël Piemontèis
a son a l’avàit spetand nòstra mòrt! Ij BOGIANEN a venta ch’a bogio!
Ël nòstr «crij ëd
dolor», coma Sénter Studi Don Minzoni – Ca dë Studi Pinin
Pacòt, i l’avìo già spantialo a la festa ’d Casele e sël nùmer dë
dzèmber, e i dovoma dì che quàich orija a l’é nen restà ciòrgna
e na frisa d’agiut i l’oma arsèivulo, belavans da l’àutra part le
spèise a calo nen e i dovoma tiré cinghia fin-a a strenze le buele,
ma la situassion a l’é pì nen mach grisa, a serca ’d dventé nèira.
La fiusa ’d podèj vëdde l’ann ch’a farìa 30 as fà semper pì sutila
e l’istess as peul dì për ij nòstri concors e për l’Armanach dij
Brandé 2012. Coma ch’i l’avìo già dit i soma semper duvert a qualsëssìa
consèj, idèja, propòsta e agiut përchè noi i voroma nen molé (se
për cas a-i fusso ’d cambiament, an bin o an pes, iv lo faroma savèj
da coste colòne). An sla carzà ’d travajé minca di an diression
ëd fé dventé nòstra publicassion semper ëd pì la vos ëd tut ël Piemont,
i l’oma duvertà (ma col uss a l’é mai stàit sarà) ij brass për cheuje
e publiché le neuve e ij contribù dij nòstri frej spantià an tuta
la region e chi lo sà che sòn a peussa nen fene sente tuti pì unì
vorendse bin? Fene savèj lòn ch’i na pense, fé sente vòstra vos
përchè i l’oma ’dcò dabzògn ëd sentve davzin a nòstr agì! Vòstre
litre, ëdcò cole crìtiche, a servo a fene chërse e vive, ma ’l silensi
a giuta mach a magoné pensand che ’l destin a sia mach nòstr. Përsonalment
i serco ’d tambussé a tuti j’uss, ma i sai nen cola ch’a podrà esse
la rispòsta. Lòn ch’i sai che se costa bela aventura a dovèissa
finì a vorerà dì che mi i l’hai falì, ch’i son nen stàit bon a fé
’l miràcol e donca im gaverai da ’nt ij pé. Coma Cincinnato i tornerai
a mie montagne e a scrive mach për mi e për mè piasì, andrai a pësché,
për bolè o a spass parland con ij vej montagnard, spetand la vìsita
’d Catlin-a stërmà da para dij mè barbis.
Për la Redassion Michel dij Bonavé
|
Da Gené 2011
as peulo caté ij nùmer vej ëd l'«Armanach dij Brandé» con un
pressi straordinari. Bin 4 nùmer,
da serne a vòstr piasì fra coj a disposission ant la lista,
al pressi 'd 15€!!!!!!!! I voroma
mach arcordé a tuti coj ch'a lo san nen che l'«Armanach dij
Brandé» a l'é nen 'n calendari da dovré për scrive ij vòstri
afé e campelo via con la fin ëd l'ann, nopà a l'é n'antologìa,
n'archeujta 'd poesìe e pròse an Piemontèis, sernùe fra la mej
produssion ëd j'autor ëd jer e 'd coj ch'a scrivo al di d'ancheuj.
Donca a l'é 'n lìber da guerné ansema a tuti j'àutri e ch'as
peul lese për tut l'ann e për coj ch'a vniran. Lasseve
nen scapé costa ocasion!!!!!!!!
CAR AMIS DËL PIEMONT E
’D SOA COLTURA
Piemontèis Ancheuj e ’l suplement
Armanach dij Brandé a son publicà dal Sénter dë Studi Don Minzoni
ch’a l’é n’associassion sensa but ëd profit, ch’a viv con ël travaj
dij volontari (belavans pòchi). Ël finansiament ëd costa publicassion
a l’é sostnù mach da j’abonament (a son peui nen n’infinità) e da
le donassion che quajdun a fà, dzorpì a-i é ’n contribù dla Region
Piemont - Assessorà a la Coltura e quaicòs a riva dal Consèj Regional
e da la Provinsa ’d Turin (na cita fërvaja e mach për l’Armanach
dij Brandé e ij Concors). I l’avreve vist che l’arvista, mersì a
la colaborassion e a l’agiut da volontarià dl’Editris Il Punto –
Piemonte in Bancarella, a l’é dventà bela e piasosa ’dcò për soa
vesta editorial (con fòto a color) e për ij contnù ch’i soma semper
angagià a mijoré për eufre un prodòt ëd qualità e coltura. I vorerìo
ancora fé mej e ’d pì, ma belavans i vëdoma ’dcò che ij cost ëd
la stampa, dël papé e dla spedission a seguito a monté. Adess i
voroma ’nformeve ’d cola ch’a l’é la situassion (nen për colpa nòstra
o për grama gestion): ël contribù dla Region a l’é frem a la prima
rata dël 2008 (donca i speterìo ’l sald dël 2008 e ’l contribù dël
2009, già assegnà e confermà), ma an considerassion dël moment ëd
crisi, dij taj a la Coltura dont as parla, a la confusion an camp
polìtich e aministrativ, noi i soma nen quand e se i arseivroma
costi sòld che a son essensiaj për la nòstra survivensa. Noi i soma
gorègn, vist ch’i soma rivà a 27 ani ’d vita dël giornal, e i voroma
nen meuire ’nt ij ravin ëd costa crisi, ma gnanca i voroma nen dëscarié
tut an sj’abonà ch’a l’han gnun-e colpe ’d sòn. Dë stracheur a ventrà
toché ’l cotìs d’abonament ( ch’a l’é frem da squasi des ani), ma
sòn a bastrà nen. Donca i voroma lansé n’apel a tuti j’amis, abonà
dël giornal o bele mach letor, për arseive ’d propòste, d’idèje,
ëd sugeriment, se peui quajdun a vorerà giutene concretament noi
i-j diroma publicament mersì. Un-a dj’idèje ch’a në smija realisàbil
(bele se a fà stòrze ’l nas) a l’é cola ’d serché d’arzorse butand
quàich reclam an sl’arvista, bin antèis seria e gropà al piemontèis.
Për cost but noi iv ciamoma se tra vojàutri a-i fussa quajdun anteressà
a costa oferta o s’a conòss ëd dite, d’artisan, ëd boteghe, assicurassion,
banche o d’àutri ch’a podrìo es-lo. L’arferiment a resta semper
col ëd la redassion con j’adresse ch’i treuve sì sël giornal. I
vë spetoma e an anans ch’av riva un mersì ’d cheur për lòn ch’i
podreve fé.
|
|
